Skibyen

Elevane i VG2 og VG3 idrett som har vore i skibyen før oss, fortalde kor kjekt det var, og at dette var ei veke som kom til å bli snakka om i lang tid etterpå, og sikkert heilt til vi går ut som tredjeklassingar. Dei som har vore der før oss fortalde at dette kom til å bli ei skuleveke som vi aldri ville kome til å gløyme, og fleire har omtalt det som ei av dei beste vekene gjennom skuletida på Vestborg.

Vi kan ikkje sei at vi er ueinige etter den flotte veka i Skibyen i Sudndalen med 20-30 minusgrader og flott skiføre. Vi la ut på den sekstimers lange turen i tre bilar, der nokre sov for å lade opp, andre for at tida skulle gå raskt slik at vi kom fram, og andre sov ikkje eit sekund. Vi hadde det ganske moro på turen ned med ulike bil-leikar og stopp undervegs. Når vi kom fram til den store luksushytta med både badekar og massasjedusjar, som vi hadde leigd i Skibyen, så fordelte vi oss på romma og starta på prosjekt «varme opp hytta».

Vi åt felles frukost i åttetida kvar morgon. Deretter starta all ski-moroa i skitrekket. Vi hadde både kurs i slalåmteknikk og portkøyring med idrettslærar Anders kor vi lærte ulike teknikkar og lette knep for å køyre godt på slalåm. Vi fekk ein del eigentrening for å terpe på teknikkar, og frikøyring kor vi kunne gjere det vi ville. Det største høgdepunktet må vere at vi fekk møte Andreas Håtveit som hadde triksekurs med oss, og lærte vekk nokre tøffe triks og hopp i Skibyen. Vi fekk også køyre snøscooter. Det var stas!!

Med så flott vær og skiføre, var dette rett og slett heilt magisk. Det var først og fremst tærne som fekk det, med tanke på kulden. Det gjorde heldigvis ikkje så ufatteleg mykje, fordi sola var der, og vi hadde moglegheita til å gå inn og varme oss i varmestova når vi hadde behov for det. Miljøarbeidaren vår Daniel tok også mange videoar med drone, og flotte bilete som var tatt «in the moment» som er utruleg kjekke å sjå tilbake på no.

Lærarane våre «mekka» i hop heilt herlege middagar etter lange skidagar mens vi fekk slappe av og finne varmen igjen. Vi fekk taco blant anna, og det var SÅ godt! Vi elevane hjalp til med rydding og vasking etter middagen, og tok den såkalla kjøkkentenesta vår då. Kveldskos på kvelden var også eit høgdepunkt etter lange skidagar i kulden, der alle var godt pakka inn i dyner eller tepper, og der det var kortspel, gitar, bildetitting frå dagen, latter, twist, og kakao.

Vi synes det var så kjekt, og så kaldt, hehe. Alle fekk pusha både seg og komfortsonene sine, og alle fekk kjenne på meistring. Fleire av oss lærte både 180 og 360 på ski, lærte å hoppe litt høgare, og alle turte å dra på litt meir i skibakken enn før. Det blei både knall og fall på dei fleste, men alle prøvde og alle fekk til. Vi trur alle vart meir trygge både på ski, og på kvarandre etter denne skuleveka, noko som er svært positivt og noko vi tar med oss vidare.

Vi skulle gjerne hatt fleire dagar i Skibyen, men vi fekk ein halv dag ekstra med kvalitetstid ettersom dieselen i den eine bilen hadde frose og bilen måtte til tining i nokre timar. Så det var ikkje noko problem for oss!

Vi synes framleis det er heilt rått at dette her er skule, og at vi har fått moglegheita til å oppleve dette. Vi skjønar no godt kva idrettsgjengen i VG2 og VG3 snakka om, for vi kjem verkeleg ikkje til å gløyme denne veka med det første. Vi har eit veldig godt samhald i klassa vår der alle trivst saman og er trygge på kvarandre, noko som gjer alt så mykje kjekkare, og opplevingane så mykje meir meiningsfulle!

Av Kristina, Amalie og Christiane i Vg1 idrett